Вокал укытучысы Гөлия Габдулла кызы җитәкчелегендәге «Зиләйлүк» студиясе 2011нче елдан бирле эшләп килә.

2018 елның 10 октябрендә Татарстан Республикасы Мәдәният министрлыгының № 1236-од номерлы боерыгы нигезендә коллективка «Халык үзешчән коллективы» исеме бирелде.

Коллектив татар халык иҗатын саклау һәм үсеп килүче буынга җыр сәнгатенең милли традицияләрен тапшыру бурычларына нигезләнеп оешкан.

«Зиләйлүк» вокал-эстрада студиясе җыр сәнгатенең өстәмә белем бирү программасы буенча эшли. Укучыларның яше: 6дан алып 16га кадәр. Программаның максаты – баланы җыр сәнгатенә җәлеп итү, иҗатка тартылуны үстерү, сәнгать ярдәмендә яшь буында рухи-әхлакый сыйфатлар һәм үз-үзеңне югары тота белү гадәтләрен формалаштыру.

Программаны үзләштерү нәтиҗәсендә укучылар музыка грамотасы һәм вокал сәнгате өлкәсендәге жанр һәм стильләр төрлелеге турындагы белемнәрен арттыралар, халык сәнгате нигезләренә төшенәләр һәм милли музыка теле чараларын һәм үзенчәлекләрен өйрәнәләр.